BAGUIO CITY – Impetteng ti Land Transportation Office-Cordillera a maipawil paylaeng ti Backriding wenno Angkas ditoy rehion iti baet a napalubusan ita nga aldaw dagiti aggasawa wenno aglive-in partner nga agangkas iti motorsiklo kas maibasar iti waragawag ti COVID-19 National Inter-Agency Task Force idi kalman.
Iti panakiyuman ti Bombo Radyo kenni LTO-CAR Regional Director Francis Ray Almora, matiliw dagiti agangkas iti motorsiklo nupay adda ti iparang dagitoy a kaskenan a dokumento.
Innayuna a saan a bigbigen ti LTO dagiti barrier a maikabil kadagiti motorsiklo agingga nga awan pay ti aprubado a disenyo nga aggapu iti nasional a gobyerno.
Kinuna ni Almora nga awan pay ti naawat ti opisina dagitoy a kopya ti naipaulog a pagalagadan ti panakaipalubos ti Angkas.
Gapu iti daytoy, dinakamatna a ti laeng iyem-implementarda ditoy rehion ket ti RA 1066 wenno ti Children’s Safety on Motorcycles Act of 2015 a mangiparparit kadagiti ubbing nga aglugan kadagiti motorsiko.
