Naiyawiden kadagiti pamilya ken pagtaenganda ti bagi dagiti dua a suldado a pimmusay iti napasamak a panagkimat iti boundaries ti Western Uma Lubuagan, ken Balatoc Pasil, Kalinga.
Iti panakiuman ti Bombo Radyo kenni Major Rigor Pamittan, chief ti 5th Infantry Divison Public Affairs Office,naiyawiden sadiay Gamu, Isabela ti bagi ni Corporal Andrew Monterubio ken adda metten sadiay Sadanga, Mountain Province ti bagi ni Private First Class Immongog F. Aronchay.
Natalged metten ti kasasaad dagiti uppat a nadangran iti nasao nga inisdente nu sadino, manarimaan ti panagpatameng dagitoy sadiay Camp Melchor F Dela Cruz Station Hospital, Gamu, Isabela.
Sigun kenni Pamittan, agtultuloy latta ti panangipatungpal dagitoy ti military operation iti baet ti napasamak nga insidente gapu ta kangrunaan a mandato ti pwersa dagitoy a pukawen dagiti armado ken maka-kanigid a grupo nga agingga iti agdama ket agtaltalinaed paylaeng iti nasao a lugar.
Innayon ti opisyal nga iti agdama ket dagiti nabatbati pay a miembro ti grupo a Komiteng Larangang Guerilla Baggas ti panggepda a pukawen iti nasao a lugar kasta metten dagiti sabali pay a grupo ti New People’s Army nga agtaltalinaed kadagiti paset ti Abra, Apayao, ken Kalinga.
Impeksa met ni Pamittan nga agserbi nga adal kadakuada nangruna kadagiti tropa iti field ken ground operations ti napasamak nga insidente nu sadino, kasapulan dagitoy ti naan-anay a panagannad.
Inlawlawagna a nupay addaan dagitoy ti combat standard operating procedures ken military tactics a sursuruten, saan latta a maliklikan ti disgrasya nu ti kalikasan ti mangipaay ti didigra.
Kabayatanna, mangipaay met dagitoy ti tulong kadagiti pamilya dagiti pimmusay a kakadwada kas ti benepisyo a maawat ti maysa a suldado nu pimmusay daytoy kabayatan nga ub-ubraenna ti pagrebbenganna.//Bombo Rob Dominguez
