Naituding nga isayangat ti gobierno ti Bagong Pilipinas Serbisyo Fair (BPSF) iti sangapulo ket tallo a probinsia inton tawen dos mil baente singko, sigun kenni House Deputy Secretary General Sofonias Gabonada idi kalman.
Dagiti probinsia ket ti Albay, Sorsogon, Camiguin, Quezon, La Union, Tarlac, Pangasinan, Nueva Ecija, Davao Oriental, North Cotabato, Misamis Occidental, Bohol, ken Aklan.
Ti Bagong Pilipinas Serbisyo Fair ket addaan panggep a maidanon ti napateg a serbisio iti nadumaduma a paset ti pagilian.
Mangipapaay daytoy ti passport applications, laboratory and diagnostic services, medical and dental services, livelihood projects, social services, panagiwaras kadagiti produkto ti agrikultura , ken dadduma pay.
Sigun kenni Gabonada, Samar ti maudi a lugar a maisayangkat ti Bagong Pilipinas Serbisyo Fair iti agdama a tawen a maipatungpal inton Nobiembre baente dos.
Idiay met Camarines Sur, Camarines Norte, Albay, ken Catanduanes, maisayangkat met ti “mini” BPSF gaputa dagitoy ti lugar a nakaro a naapektaran ti naglabas a bagyo iti Pilipinas.
Mangipaay pay ti Bagong Pilipinas Serbisyo Fair kadagiti serbisio a pakairamanan ti emergency employment program tiDepartment of Labor and Employment, health program ti Department of Health, ken housing program ti National Housing Authority iti uppat a probinsia idiay Bicol.
