Impanamnama ti Baguio Central University (BCU) ti panangipaayna iti suporta iti maisayangkat a Dugong Bombo 2026, nga idauloan ti Bombo Radyo ken Philippine Red Cross inton Nobiembre.
Sigun kenni Dr. Elma D. Donaal, Vice President for Academic Affairs iti Baguio Central University, manamnama a makipaset dagiti estudyante ti unibersidad iti nasao nga aktibidad, nangruna dagiti estudiante manipud iti College of Criminal Justice Education (CCJE) ken iti Hospital Management.
Kinunana a napateg ti aktibidad iti panagtinnulong dagiti institusyon gaputa maysa daytoy a wagas tapno maipakita ti panagsuporta ken panagserbi kadagiti kameng iti komunidad, nangruna kadagiti agkasapulan iti dara.
Kinunana pay a kanayon a makitintinnulong ti BCU iti Bombo Radyo iti kapada a kita ti aktibidad, a pakairaman dagiti estudyante ken mannursuro, tapno makatulongda iti panangipatungpal kadagiti programa a mangipapaay iti pagimbagan ti publiko.
Maipalagip a ti Dugong Bombo ket maysa a programa a maar-aramid tunggal tawen tapno mangawis kadagiti boluntario a mangted iti dara, a makatulong iti panangsalaknib iti biag dagiti pasiente a kasapulanda iti ospital.
Kabayatanna, ginuyogoy ni Dr. Donaal ti publiko a makipaset iti nasao nga aktibidad babaen iti panagboluntario a mangted iti dara, no maikari ken nasayaat ti kasasaad ti salun-atda, tapno makatulong iti panangsalaknib iti biag dagiti dadduma. | via Bombo Khey Reparip
