Saan nga umanamong ni Baguio City Congressman-elect Atty.Mauricio Domogan iti panakaisubli ti impeachment case kontra kenni Vice President Sara Duterte iti Kamara manipod iti Senado.
Iti panakaiuman iti Bombo Rayo kenni Atty.Domogan,dinakamatna nga awan iti makitana a probisyon iti konstitusyon a mangikalintegan a mabalin nga i-remand wenno isubli ti Senado iti Kamara ti impeachment case a nalpas nga inawatda.
Sigun kenni Atty.Domogan, ti laeng masapol nga agbalin a desisyon iti Senado ket ti i-convict ti akusado nu mapaneknekan a nakaaramid kadagiti impeachable offence wenno i-acquit daytoy.
Patien ni Atty. Domogan a ti nagbalin a tignay iti Senado ket maysa laeng a panangitantan wenno delay iti proseso a mabalin metten koma a rugyan.
Kinunana a kalpasan iti panagsapata dagiti Senador kas hues iti impeachment proceeding, masapolda nga awaten dagiti ebidensya iti prosecution ken denggen ti benneg ti akusado, sakbay a mangipaay dagitoy iti pangngeddeng – convict wenno acquit.
Innayonna a nu adda dagiti makitada a problema kadagiti impeachment complaints ket mabalin daytoy a matingiting kabayatan ti proseso nu sadino, ti Lower House wenno ti Kamara ti mangsungbat kaspangarigan makwestyunaran nu defective ti naipila nga impeachment complaint.
Mainaig iti dayta, kinuna ti sigud a local chief executive iti City of Pines a ti impeachment iti pagilian ket “matter of number game” nu sadino, maysa a problema daytoy gapu ta patienna a saan a maikkat ti political alignment.//Bombo Rob Dominguez
