BAGUIO CITY – Inkalintegan ni Congressman Mark Go a dimmalan iti umno a konsultasyon ken proseso ti isaksakadna nga House Bill No. 9428 seknan iti segregation dagiti 13 a barangay iti Baguio City.
Reaksiyon daytoy ti kongresista iti pammabalaw ti sumagmamano a councilor a mangibgbaga a saan a dimmalan iti konsultasyon ti nasao a gakat.
Sigun kenkuana, sinurotna ti proseso ti kongreso iti panakatalantan ti House Bill 9428 ken impatungpalna ti konsultasyon itay kallabes a dinar-ayan dagiti maseknan nga opisyales ken stakeholders a pakairamanan dagiti opisyal manipud kadagiti 13 a babbarangay, representative ti Mayor’s Office ken daduma pay a maseknan a konsehal.
Innayonna a naipatungpal pay ti special consultation iti technical working group a bukbuklen dagiti mseknan a barangay, Department of Environment and Natural Resources (DENR), Bases Conversion and Development Authority (BCDA), John Hay Management Corporation (JHMC), ken National Commission on Indigenous Peoples (NCIP) para iti pannakaadal dagiti technical description ti nasao a gakat.
Nupay kasta, inaklonna a saanna nga inimbitaran dagiti agrirriri a konsehal agsipud ta dagiti laeng kangrunaan nga opisyal ti kinunsultarna.
Iti baet daytoy, innayonna a silulukat met ti opisinana iti aniaman a singasing wenno opinion manipud iti publiko.
Gapu iti daytoy, kidkiddawenna kadagiti maseknan nga nasaysayaat nga imbes a mangbbalaw dagitoy ket mangisumitirda lattan iti kapanunotanda no kasano a mapasayaat ti nasao a gakat.
Sigun pay kenkuana, nailaylayon nga agingga inton Lunes ti panakaisumitir ti singasing manipud kadagiti maseknan nga opisina.
Maipalagip a dagiti babbarangay a makidkiddaw a maisina wenno maisegregate manipud iti masakupan ti Camp John Hay ket ti Camp 7, Country Club Village, Greenwater, Happy Hallow, Hillside, Loakan-Apugan, Loakan-Liwanag, Loakan Proper, Lower Dagsian, Lucnab, Sta. Escolastica Village, Scout Barrio ken Upper Dagsian.
Patien ni Congressman Go a babaen iti impilana a gakat ket naan-anayen a maisina dagiti nasao a babbarangay manipud iti masakupan ti Camp John Hay.//Mera Pacpacan
