Madanagan dagiti kameng iti Baguio City Council seknan iti mapangpanggep a Quirino Hill–Pinget bypass road, gapu iti posible a pangta daytoy iti napateg a watershed ken ti kinakurang iti proseso iti bidding.
Ti proyekto, a panggepna a pagsilpuen ti dua a barangay ken agserbi nga alternatibo a ruta paturong idiay La Trinidad, Benguet, ket nailatangan iti agarup P23.9 milyon manipod iti 2025 budget iti Department of Public Works and Highways.
Numan pay panggep daytoy a mapasayaat ti emergency access ken kinatalged dagiti estudiante, kinuwestunar dagiti konsehal nu apay a dagos daytoy a naipasidong iti bidding ken nai-award wenno naipaay iti Jaben General Contracting and Engineering Services uray awan paylaeng ti kumpleto a panagapbrobar manipod iti lokal a gobierno ken kadagiti environmental clearance.
Sigun iti konseho, kurang paylaeng ti sumagmamano a dokumento a kidkiddawen iti Department of Environment and Natural Resources, karaman ti land status certifications ken pormal a resolusion manipod iti konseho. Maysa kadagiti kadaklan nga isyu ti posible nga epekto daytoy iti aglawlaw.
Iti plano dagitoy a diretso nga alignment iti kalsada, kasapulan a maputed ti nasurok 20 a puon iti Buyog Watershed.
Impaganetget ni Baguio City Councilor Peter Fianza a nabayag a bimmasit ti kinalawa ti watershed, isut gapuna a makukuwestunar ti kanayunan a saklaw iti kontruksion iti lugar.
Adda metlaeng dagiti opisial ti nangibaga a saan nga umdas a nailawlawag iti publiko ti kinalawa iti saklawen iti proyekto a maibilbilang a protected land, ken kidkiddawenda a mangisayangkat paylaeng iti Environmental Impact Assessment (EIA) sakbay a maituloy.
Insingasing met ni Baguio City Vice Mayor Faustino Olowan ti posibilidad a makanselar paylaeng ti agdama a bidding tapno maipaayan dagiti panagbalbaliw ken ad-adda a nalawa a konsultasion, pakairamanan ti pannakikoordinar iti Baguio Water District.
Iti kamaudiananna, nangipasa iti City Council iti maysa a resolusion a mangibilbilin a mangisubmitir iti kumpleto nga environmental assessment ken siguraduen a ti proyekto ket sumursurot iti amin a linteg seknan iti aglawlaw.
