Naikeddeng nga i-award wenno ipaay ti lokal a gobierno ti siudad ti P1.19 bilion a gatad ti Baguio City Integrated Terminal (BCIT) project iti Megawide Construction Corporation kalpasan a kinumpirmar ti public-private partnership pre-qualification, bids and awards committee (PPP-PBAC) nga awan ti dadduma a nagaplikar iti proyekto para iti “bidding” sakbay ti Oktubre 14 a deadline.
Pormal nga inrekomendar ti bids and awards committee, babaen iti resolusion, kenni Baguio City Mayor Benjamin Magalong ti panangipaay ti proyekto iti nasao a kompania.
Sigun kenni City Treasurer ken bids and awards committee chairwoman Alex Cabarrubias, naaramid ti desision kasaruno ti pannakakumpleto ti proseso a nagbayag manipod July 16 agingga idi Oktubre 14.
Immuna a nangisubmitir ti nasao a kompanya iti maysa nga ‘unsolicited proposal’ para iti pannakaibangon ti Baguio City Integrated Terminal, a nadisenyo tapno ma-decongest ti central business district babaen iti panangipasdek ti main terminal para kadagiti provincial buses ken public utility vehicles a sumrek iti siudad.
Maakomodar metlaeng iti proyekto dagiti local jeepneys, modernize jeepneys ken taxi.
Ti panggep a terminal ket maibangon iti Barangay Dontogan, Marcos Highway a nadisenyo a mangakomodar ti agingga uppat a gasut a bus iti tunggal aldaw.
Ti lokasion ket lima nga ektarya a daga a napagnumuan iti nagbaetan ti lokal a gobierno ti siudad ken ti Bureau of Animal Industry-Department of Agriculture.
Iti kanito a malpas, agserbi kas “final stop” ti Baguio City Integrated Terminal para iti provincial bus tapno maliklikan dagitoy a sumrek iti business district.
Manamnama a makumpleto ti pannakaibangonna iti uneg ti dua a tawen.
