BAGUIO CITY- Kinumpirmar ni Jail Superintendent April Rose Wandag-Ayangwa, Warden ti Baguio City Jail Male Dormitory a maiyuswat ita a tawen ti kaunaan a College Education Behind Bars(CEBB)program iti Baguio City Jail.
Makitinnulong wenno agserbi met a partner iti nasao a programa ti Benguet State University (BSU) nu sadino, dumanonen iti innem a balud wenno Persons Deprived of Liberty(PDL) ti nakaenroll iti daytoy a manamnama nga agadal bayat nga agtaltalinaedda iti pagbaludan.
Napili dagiti benepisyaryo iti nasao a programa babaen iti inkeddeng a requirements ti nasao a pagadalan pakairamanan ti panagturposda iti high school ken ti panangipasada iti admission exam.
Kabayatanna, blended learning ti maaramat a wagas iti nasao a programa nu sadino, manamnama dagiti gundaway nga agturong dagiti mannursuro iti Baguio City Jail ken mangipaay dagitoy ti modules kadagiti nakaenroll a balud tunggal awan maangay a face-to-face a klase dagitoy.
Immuna metten a naipatungpal ti College Education Behind Bars program idiay Davao nu sadino, panggep daytoy a tulungan dagiti balud a mangparmek kadagiti personal, economic, social, ken civic deficiencies babaen ti panangipaay ti kalidad a tertiary education.
Iti agdama, saan pay a nadakamat mu mano nga oras ken bulan ti mabusbos para iti panakaipatungpal ti nasao a programa ngem naipanamnama a maangay ti orientation apaman a mapinal dagiti enrollees.//Bombo Jez lapizar
