BAGUIO CITY – Agsagsaganan ti lokal a gobyerno ti Baguio ken dagiti maseknan a departamento ken opisina para iti panagrugi ti summer vacation wenno ti SumVac 2018.
Sigun kenni City Administrator Atty. Carlos Canilao, adu dagiti programa ken aktibidad a maipatungpal ita a bulan kagiddan ti manamnama manen a panagsangpet dagiti adu a turista ditoy lokalidad.
Kinunana a gapu iti daytoy ket posible a kadagiti sumaruno nga aldaw ket kataripnongda dagiti maseknan nga ahensia kas iti Baguio City PNP, Department of Tourism ken ti Department of Public Works and Highways malaksid pay kadagiti nagduduma a volunteer groups para iti panakaiwanwan ti siudad kabayatan ti atiddog a bakasyon.
Innayonna nga agtululoy met ti panangipatungpalda iti seminar ken panagsanay kadagiti frontliners ti turismo iti siudad para iti napintas nga implementasyon ti tourism statistics standard.
Impalawagna a babaen iti daytoy ket nalaklaka a maamuan ti pudno a bilang dagiti turista a nagturong iti siudad nangruna ta sumagmamano a pagdagdagusan dagiti sangaili ti saan a mangisumsumitir iti pudno a datus dagitoy.
