BAGUIO CITY – Nagleppas ti Baguio City iti maika-dua a pwesto iti kaleppas a Batang Pinoy 2024 a naangay idi Puerto Princesa City, Palawan manipud November 23 iti agdama a tawen agingga November 29, 2024.
Saan a naidepensar ti team Baguio ti maika-lima koma a nagsasaruno a kampeonato dagitoy agsipud ta indominar ti Pasig City ti nasao a kompetisyon.
Nakaala ti Team Pasig iti pakabuklan a 285 a medalya a buklen ti 105 gold, 64 silver ken 116 bronze.
Nakaala met ti team Baguio iti pakabuklan a 253 a medalya a buklen ti 92 gold, 72 silver ken 89 bronze.
Maibaga a dakkel daytoy nga improvement ken accomplishment para iti Pasig City agsipud ta idi napan a tawen ket nagleppasda iti maika-dua a pwesto bayat a ti Baguio City ti nagkampeon.
Nupay saan a naala ti Baguio City ti kampeonato ita a tawen, dakkel latta a pakaidayawan ti siudad ti maika-dua a pwesto agsipud ta namin ado metten a daras a nagtalinaed ti siudad kas top performer iti Batang Pinoy.
Dumanon met iti agarup ₱5 million pesos cash ti maipaay a premyo para iti kampeon, agarup P4 million iti first runner-up, agarup P3 million iti second runner-up, P2 million iti third runner-upp ken agarup P1 million iti fourth runner-up.
Kabayatanna, dakkel met nga accomplishments para iti Benguet province ti nagun-od a pwesto dagiti atleta ken coaches ita a tawen.
Daytoy ket kalpasan a nagleppasda iti maika-sangapulo ket lima a pwesto manipud iti maika-innem a pulo ket siyam a pwesto idi napan a tawen.
Maipalagip a saan a napan amin dagiti atleta ti Benguet iti nasao a kompetisyon gapu iti kinakurang ti pinansiyal nga aramaten dagiti atleta ken coaches.//Cara Sacyaten
