BAGUIO CITY – Makikokoordinar ita ti Baguio City Police Office (BCPO) iti Philippine Military Academy (PMA) ken iti netizen a nangi-post iti maatap a surat daydi Cadet 4th Class Mario Telan Jr. seknan iti maatap a panakaparigat daytoy iti uneg ti akademya.
Iti interview ti Bombo Radyo kenni PCol. Allen Rae Co, director ti BCPO, kinunana a saanda pay a makarugi nga agimbestigar gaputa awan pay ti naal-alada a kopya ti nasao a surat.
Kinunana a makikokoordinarda kadagiti maseknan tapnu maamuan ti authenticity wenno kinapudno ti nasao a surat ken no daytoy ket pudno a nagtaud iti diary ti pimmusay a kadete.
Dinakamatna a no pudno man ti surat ket napaneknekan laeng a naparigat ni Cadet Telan kas maibasar iti salaysay daytoy iti nasao a surat.
Innayon ni Co nga agingga a saanda a nakumkumpirkar ti kinapudno ti surat ken awan ti naisaganada a sumaruno nga addang ket awan pay ti maipaayda a kompleto a detalye.
Kabayatanna, al-allukoyen ni PMA spokesperson Capt. Cheryl Tindog ti FB user a ni Jose Larry Hermoso IV iti panangipaay daytoy iti akademya iti iggemna a surat ni Cadet Telan a nakaidetalye-an ti panagparigat a napasaran daytoy.
Kinunana a babaen iti daytoy ket maimbestigaran ti nasao nga isyu ken madusa dagiti nangabuso kenni Cadet Telan no mapaneknekan a pudno ti nailanad iti surat.
Maibasar iti nasao a post ni Hermoso, kabagian ni Cadet Telan ti nangited kenkuana iti nasao a surat ti pimmusay a kadete a nakailanadan a nakapasar ni Cadet Telan iti pammugbog, panagkudkudtar, panagparintumeng, panagbekkel ken dadduma pay a panagparparigat.
