BAGUIO CITY – Inaklon ti Baguio City Police Office a marigatanda iti panangiwanawan kadagiti indibidual nga agar-aramat ken agtuptupra ti moma iti siudad iti baet ti nainget a panakaipatungpal ti Anti-Moma Ordinance.
Iti interview ti Bombo Radyo kenni PMaj. Harriet Bulcio, panakangiwat ti opisina, nalaing dagiti indibidual a mangilibas iti panagngalngal ken panangitupra da ti moma.
Innayona nga adda dagiti CCTV camera kadagiti nagduduma a lugar iti siyudad ngem daduma a banag ti pokus daytoy.
Malaksid iti dayta, uppat nga indibidual ti natiliw ti opisina iti umuna a kwarter iti agdama a tawen a naglabsing iti Anti-moma Ordinance ti siudad.
Sumagmamano kadagiti natiliw ket jeepney driver, ken dagiti nakatambay nga indibidual iti parket ti siudad.
Pabor met ti opisina iti panakaiyusuat manen ti Anti-Moma Ordinance tapno ad-adda a mapalagipan dagiti umili ken bisita iti siudad seknan iti nasao nga ordinansa.
Kabayatanna, P500 ti multa ti umuna a panakatiliw, P1-K nu 2nd offense, ken P2-K nu maikatlo a gundaway a natiliw gapu iti panaglabsing iti nasao nga ordinansa.//Bombo Jez Lapizar
