Posibleng maging pilot site ang Baguio City para sa teknolohiyang gumagamit ng Wolbachia bacteria upang mapigilan ang mga lamok na maghatid ng dengue.
Ayon kay Baguio chief epidemiologist Dr. Donabel Tubera Panes, dalawang kumpanyang namuhunan sa teknolohiya ang nagpahayag ng interes na gamitin ang lungsod bilang modelong lugar bago ito posibleng ipatupad sa iba pang bahagi ng bansa.
Ang Wolbachia ay likas na bacteria na maaaring pumigil sa pagdami ng dengue virus sa loob ng Aedes aegypti mosquito. Sa Australia, kung saan ipinatupad ang teknolohiya, iniulat na bumaba ng 77% ang dengue cases at 86% ang mga naospital.
Sa Baguio, nasa 543 na ang kaso ng dengue mula Enero, ayon sa datos ng lungsod.
Samantala, umabot na sa 272 kaso ang dengue sa Tacloban City hanggang Agosto 8, o 31% na pagtaas kumpara sa kaparehong panahon noong nakaraang taon.
Sa buong Cordillera, nakapagtala ang Department of Health ng 4,436 dengue cases mula Enero 4 hanggang Agosto 8, kabilang ang pagtaas ng kaso sa Abra, Benguet, Kalinga at Ifugao.
Hinimok ng mga health official ang publiko na alisin ang mga lugar na maaaring pamugaran ng lamok, panatilihing malinis ang paligid at agad magpakonsulta kapag nakararanas ng sintomas ng dengue.
