BAGUIO CITY – Umawat manen ti Baguio City kadagiti turista nga agtaud iti NCR Plus a pakairamanan ti Metro Manila, Cavite, Laguna, Rizal ken Bulacan.
Iti interview ti Bombo Radyo Baguio, kinuna ni City Tourism Officer Engr. Alec Mapalo a daytoy ket kalpasan nga impalubos ti nasyonal a gobyerno ti panagbiahe dagiti residente iti NCR Plus kadagiti lugar nga adda iti sidong ti modified general community quarantine.
Inlawlawagna nga uray naka-GCQ ti Baguio ket maipalubos latta ti panagturong ditoy dagiti turista manipud NCR Plus gapu iti resolusyon ti IATF idi pay Pebrero a nangipalubos iti panagawat ti siudad kadagiti turista gapu iti epektibo a panakaimaton ti COVID-19.
Maipalagip nga iti maudi a lawas ti Marso ket naiparit ti leisure travel dagiti residente ti NCR Plus gapu iti panagngato ti kaso dagitoy iti COVID-19.
Innayon ni Mapalo a nangrugin ti panagawatda iti aplikasyon dagiti turista manipud NCR Plus a kayatda ti agbisita ditoy siudad.
Mangnamnamada a babaen iti panakaipalubos ti leisure travel kadagiti residente ti NCR Plus ket manayonan dagiti turista a mapasangbay ti Baguio a makatulong iti agtultuloy a panagrekober ti sektor ti turismo ditoy siudad.
