Baguio City- Nangipila ni Baguio City Congressman Mark Go iti maysa a resolusyon a mangkidkiddaw ti pannakaintantan ti Social Security Commission iti naituding a panakaipangato ti kontribusyon dagiti miembro ti nasao nga ahensya.
Nakalanad iti House Resolution (HR) 2157 a rumbeng a saan pay a maimplementar ti kanayunan a member contributions gapu pay laeng iti mapaspasaran nga inflation.
Sigun iti kongresista, agtultuloy ti panagngato dagiti kangrunaan a gagatangen a mangparparigat kadagiti ordinaryo a Pilipino.
Naituding nga agbalin a 15% ti agbalin a kontribusyon dagiti miembro ti SSS mangrugi ita a bulan ti Enero iti agdama a tawen.
Maibasar pay iti datus ti Philippine Statistics Authority, ngimmato ti inflation ti pagilyan iti 2.9 per cent idi Disyembre manipud iti 2.5 per cent idi Nobiembre idi napalabas a tawen.
Innayon pay ni Go a kasapulan nga ikonsidera ti Social Security Commission ti pannakaitantan ti hike contribution tapno maikkan gundaway dagiti low income earners a makasalimetmet gapu iti nangato a presyo dagiti kangrunaan a pagkasapulan.//via Bombo Newsroom
