Inyebkas iti Baguio Correspondents and Broadcasters Club Inc. (BCBC) ti panagdanagna iti pannakadadael ti relasion iti nagbaetan iti media ken iti Police Regional Office-Cordillera (PRO-Cordillera).
Iti statement, nakikaykaysa ti BCBC iti Cordillera PNP Press Corps, nga itay laeng nabiit ket nangwaswas iti lideratoda kas protesta iti pannakatrato a sinagabada.
Dinakamat metlaeng iti BCBC a ti nabayagen a pannakitinnulong iti media ken pulisia ket napateg tapno maipasigurado ti umno nga impormasion a maipablaak wenno maipakaamo iti publiko, mapapigsa ti “transparency,” ken mapagtalinaed ti “democratic checks and balances.”
Nakalanad pay iti statement a ti nasayaat a relasion iti nagbaetan iti media ken kadagiti institusion iti gobierno partikular ti Philippine National Police (PNP), ket nakapannuray iti agpada a respeto ken propesional a kooperasion wenno panagtinnulong.
Dinakamat pay ti nasao nga organisasion dagiti insidente nu sadinno saan a mairamraman dagiti journalists iti opisial nga aktibidad, seremonia, ken press briefing, a mangpakpakapuy iti transparency.
Maysa a nalawag a pangiyarigan ti regional press conference idi Pebrero 20, 2026 iti Camp Bado Dangwa, nu sadino ad-adda a saan a nairaman ti mabigbigbig a press corps.
Inladawan iti BCBC ti nasao nga insidente kas “maysa a makapaupay a pannakailaksid,” ken impaganetgetna a ti panaglimitar iti panagayus ti impormasion tapno masalakniban ti imahe ti institusion ket dadaelenna ti panagtalek ti publiko.
Babaen iti pannakawaswas iti lideratoda, imparikna iti Cordillera PNP Press Corps a saan a bigbigen dagiti journalist ti maysa a “pakitang-tao” iti relasion nga awanen iti aktual.
Kidkiddawen ti BCBC iti PRO-Cordillera a sukimaten ti engagement protocols dagitoy, ken impaganetgetda a ti nawaya a media ken transparent transparent police force ket saan a kabusor, nu duket nasken a “partners” para iti natalged ken naamuan a kagimungan.
Pinasingkedan manen ti BCBC ti panagkumitna iti kinapudno ken propesional a dignidad, ken agtultuloy a suportaran dagiti journalist iti panagsapsapulda iti silulukat ken patas nga aglawlaw ti panagireport.
