Impablaak iti Baguio City Public Library ti panangiyuswat iti Baguio Learning Passport, maysa a personal a booklet a panggepna a guyoguyen ti agtultuloy a panangadal dagiti umili ken bisita iti siudad ti Baguio.
Nangrugi daytoy idi Sabado, Abril 25, nu sadinno mabalin nga agparehistro ti siasinoman nga interesado tapno makaala ti bukodda a Learning Passport. Panggep ti programa nga ilista ti pannakipaset dagiti participants iti nagduduma nga aktibidad iti workshops, saritaan, storytellong sessions, digital literacy programs, ken kadagiti cultural forum.
Sigun iti dadaulo iti library, simple laeng ti proseso: agrehistro iti library, alaen ti booklet, makipaset kadagiti learning activity, ken agkolektar kadagiti stamps kas pammaneknek iti pannakipaset. Iti tunggal lebel, mabalin a makaala ti award dagiti participants.
Adda ti uppat a lebel iti programa; Learning Explorer, Community Learner, Knowledge Builder, ken Lifelong Learning Champion.
Nakalukat ti Baguio Learning Passport iti amin a tawen wenno edad, kas suporta iti pammati a ti panagsursuro ket tungpal biag a panagdaliasat para iti tunggal maysa.
Ti nasao a programa ket manamnama a mangpalawa iti pannakaamo ken pannakipaset iti komunidad kadagiti educational activity iti siudad ti Baguio.
