Puntiria iti lokal a gobierno iti siudad ti Baguio a makapagsanay iti saan a bummaba a limagasut a community mental health coaches iti agdama a tawen tapno matulungan ti umad-ado nga agkasapulan iti counselling.
Sigun kenni Mayor Benjamin Magalong, makatulong dagiti coach iti panangpapigsa iti mental health program iti siudad, karaman ti panangsanay kadagiti barangay health worker seknan iti mental health first aid.
Panggep metlaeng ti siudad a maipasigurado nga addaan iti access iti school counselors kadagiti parapubliko a pagadalan iti pannakitinnulong iti Department of Education.
Innayon pay ni Mayor Magalong a puntiriada a magun-od ti zero untreated mental health cases kadagiti pagbaludan ken rehabilitation centers iti tawen 2028, bayat ti panangitandudo ti Baguio kas natalged ken mentally resilient a siudad.
Kabayatanna, kinuna ni Dr. Ricky Ducas nga agtultuloy ti panangsanayda kadagiti student peer facilitators tapno tumulongda a mangilasin ken mangsuporta kadagiti agtutubo a makapadas iti mental health issues.
Paset daytoy iti suporta iti siudad iti AnchorED 1M campaign iti Emotional Reset Center, a panggepna a makapagsanay iti maysa a milion a mental health coaches iti Pilipinas sakbay ti tawen 2030.
