BAGUIO CITY – Nanayonan ti pwersa ti pulisya ti Baguio kagiddan ti panakaisayangkat ti nagduduma nga aktibidad ditoy siudad ita a holiday season.
Sigun kenni PCol. Allen Rae Co, dadaulo ti Baguio City Police Office (BCPO), gapu iti daytoy ket nakasaganadan a mangbantay kadagiti umili kabayatan dagiti nasao nga aktibidad tapnu maipasigurado ti panakasurot dagiti paglintegan kontra iti COVID-19.
Dinakamatna a maysa a tutukanda ket ti panakasurot ti minimum health standards kabayatan ti Simbang Gabi iti nagduduma a simbaan ditoy siudad, nangruna iti Baguio Cathedral.
Imbingayna pay nga iti baet ti panakaipalubos ti Simbang Gabi ket irekrekomendarda latta ti panagliklik ti publiko iti mass gathering wenno panagu-urnong iti maymaysa a lugar gapu iti posibilidad a panakaiwaras wenno panakaiyakar latta ti coronavirus nangruna kadagiti ubbing ken natataengan.
