![](https://img.bomboradyo.com/baguio/2019/08/bong-pascual.jpg)
BAGUIO CITY – Adda ti adjustment iti panagsanayna ti Baguio pride ken kakaisuna a Pinoy international referee a nairaman manen kadagiti napili nga agserbi kas official referee iti 2019 FIBA Basketball World Cup a maangay sadiay China.
Iti interview ti Bombo Radyo, inaklon ti 49-anyos a ni Ferdinand ‘Bong’ Pascual a gapu iti edadna ket adda ti panag-adjust iti panagsanayna kas panagsagana iti nasao a torneyo.
Kinunana nga iti tawenna ket maysa oras ita ti walking exercise-na manipud iti 25 agingga 30 a minutos nga ehersisyona idi kabanbannuaganna.
Innayonna a saan a nalaka ti pagdaldalanan dagiti aspiring international referees gaputa kasapulan a maipasidongda iti nainget a panagsanay malaksid pay kadagiti kwalipikasyon nga itudtuding ti FIBA.
Kinuna ni Pascual a saanna a ninamnama a mairaman manen daytoy kadagiti agserbi nga official referees iti 2019 FIBA Basketball World Cup gaputa naipaayan metten daytoy iti gundaway nga ag-officiate iti prestihiyoso a torneyo idi nag-referee daytoy iti 2014 FIBA World Cup a naangay sadiay Spain.
Nagserbi metlaeng daytoy a referee iti adu nga international basketball competitions kas iti 2016 Rio Olympics ken ditoy Asya.
Imbingayna a maysa a saanna a malipatan ken kapintasan a kapadasanna iti panagbalinna a referee ket idi nag-officiate kadagiti dadakkel a basketball games sadiay Amerika a kayatna met a mapasadan sadiay deserving youth ditoy Pilipinas.
Mangnamnama pay ni Pascual nga adda dagiti agtutubo iti pagilian a sumurot iti karerana iti tay-ak ti basketball nangruna iti panagbalin nga international referee.
Impeksana pay ti nalaus a panagyamanna iti Baguio City a nag-adalanna iti kolehiyo gaputa ditoy a nangrugi ti karerana iti basketball.