BAGUIO CITY–Naituding nga agleppas ita a lawas ti training camp ti Igorot boxer a ni Dayer Gabutan para iti labanna sadiay sadiay Xi An, China inton May 15 para iti bakante a World Boxing Council (WBC) Asian Boxing Council Silver Super Flyweight Title.
Makasango ti 29-anyos a sigud a WBO Oriental Bantamweight Champion ti 23-anyos nga ‘up and coming boxer’ ti China a ni Zong Li He.
Sigun kenkuana, dakkel a tulong ti baro a trainer daytoy a ni Felix Tañamor partikular iti panakaisimpa ti game plan nga aramatenna kontra kenni Zong Li.
Innayonna nga agbalin a bentahena ti kapadasanna ken ti kaatiddog ti madanun ti imana malaksid pay iti nainget a panagsanayna nangruna ta adu a baro nga istratehiya ti naadalna manipud iti baro a coach daytoy.
Dinakamatna pay a ‘looking forward’ daytoy iti panagsangoda kenni Zong Li gaputa kayatna manen ti agbalin a kampeon.
Nakailista ni Gabutan iti professional boxing record a duapulo a panangabak nga addaan ti sangapulo ket maysa a knock outs, innem a panaka-abak ken tallo a draw.
Manamnama a kalpasan ti panagsanayna ita a lawas ket agbiahedan paturong sadiay China.
