BAGUIO CITY – Nagun-od ni undefeated Ifugao boxing sensation Carl Jammes Martin ti bakante a WBA Asia Bantamweight title iti panagsangoda iti ring kenni George Lumoly manipud Indonesia.
Nagserbi ti labanda a main event ti Battle of the Fist sadiay Lagawe, Ifugao idi kanikadua.
Nangabak ti 19-anyos nga Igorot boxer kalpasan ti panang-knockout-na kenni Lumoly iti maikatlo a rikos ti labanda.
Gapu iti daytoy, nagbalin a 9 wins nga addaan ti 8 knockouts ti fight record ni Martin nga agdama metlaeng a WBO Oriental Youth Bantamweight title holder.
Napaay met ni Lumoly a mangituloy iti dua a nagsaruno a panangabakna ken nagbalin a 10 wins-5 loss-1 draw ti fight record daytoy.
Kabayatanna, napaay met ti 17-anyos a ni John Hasim Magagmoc manipud Ifugao a manggun-od iti bakante a Luzon Professional Boxing Association (LuzProBA) Flyweight Title kalpasan a naabak daytoy iti labanda iti 23-anyos a ni undefeated Enrique Magsalin.
Immaton ti Games and Amusement Board ti nasao a boxing event nga inorganisa ti boxing promoter a ni Ret. B/Gen. Ramon Yogyog.
