Generally peaceful sadiay Bakun, Benguet kagiddan ti umadanin a May 12 National ken Local elections.
Iti panakiuman ti Bombo Radyo kenni Richard Buenaventura, Commission on Elections (COMELEC) Election Officer sadiay Bakun, Benguet, kinunana nga iti pakasaritaan ti nasao a lugar ket awan pay ti napaspasamak nga election-related incidents.
Nopay kasta, kinunana a saan dagitoy nga agpakampante rason nga agtultuloy ti koordinasyon dagitoy kadagiti kapulisan kasta met kadagiti nagduduma a maseknan nga ahensya tapno maliklikan dagiti anyaman nga untoward incidents.
Iti sabali a bangir, mangrugin inton bigat ti campaign period kadagiti local candidates rason a mangrugi met ti Nationwide Operation Baklas dagitoy.
Sigun kenni Buenaventura, naituding nga agturong dagitoy sadiay Poblacion, Bakun, Benguet inton bigat gapu kadagiti naawatda nga impormasyon nga adda dagiti campaign materials a naikarga wenno naikabit kadagiti maiparit a pakaikargaanna kas kadagiti poste, puon ti kayo ken daduma pay.
Kabayatanna, impeksana nga ita nga aldaw ket opisyal a maideklara dagiti agngayngayangay kas kandidato.
