BAGUIO CITY – Nalned ti maysa nga onse-anyos a balasitang iti First River sadiay Cabaruan, Tabuk City, Kalinga idi kanikadua.
Nailanad iti report ti pulisya a ti balasitang ket estudyante ti Grade 7 ken residente ti Barangay Laya East, Tabuk City.
Maibasar iti report, kalpasan a naglaba ken nangan ti balasitang ken dagiti uppat a kakadwana iti igid ti nasao a karayan ket napan naglangoy ti balasitang ken ti maysa kadagiti kadkadwana.
Nupay kasta, naiyanod dagitoy gapu iti napigsa nga agos ti danum iti karayan no sadino, ginandat dagiti dua a kadwada nga ispalen dagitoy ngem nairamanda a naiyanod.
Nabaelan dagiti uppat a kakadwa ti balasitang a maispal ti tunggal maysa ngem napaayda a matulongan ti balasitang.
Dagus a naitaray ti balasitang iti ospital apaman a narekober daytoy ngem naideklara a dead on arrival bayat a maipaspasidong iti obserbasyon dagiti kakadwa daytoy.
