BAGUIO CITY – Im-imbestigaran ti pulisya ti pakabigbigan ti dua a nakamotorsiklo a nagpalpaltog iti balay ti kandidato iti kinakonsehal ken ti asawana nga opisyal ti Department of the Interior and Local Government (DILG) sadiay Pamutic, Pidigan, Abra pasado alas dose iti parbangon idi kalman.
Iti interview ti Bombo Radyo Baguio kenni P/Maj. Carol Lacuata, information officer ti Cordillera PNP, dua a lalaki a nakamotorsiklo ti nangpalpaltog iti balay da Ruby Anin Belandres Valera a kandidato iti kinakonsehal ti Pidigan, Abra ken Rene Velasco Valera nga assitant director ti Office of Project Development Services ti DILG Central Office.
Kinunana a natamaan ti gutter ti balay dagiti Valera.
Nakarekober met dagiti pulis iti tallo a basyo ti bala iti nasao a balay nga addaan kaadayo a sag-dua a metro.
Maibasar iti Certified List of Candidates ti COMELEC, ni Ruby Belandres Valera ket agngayngayangay kas konsehal ti Pidigan, Abra.
