BAGUIO CITY- Agtultuloy ti panangikampanya ti Balik Probinsya, Bagong Pag-asa Committee ti Cordillera Regional Development Council (RDC-CAR) iti nasao a programa para kadagiti umili a kayatda ti agsubli iti nagtaudanda a probinsia iti rehion.
Kagiddan daytoy ti panangaprobar ti komiti iti Work and Financial Plan para iti implementasyon ti Balik Probinsya, Bagong Pag-asa Program ita a tawen.
Maipalagip nga idi napalabas a tawen ket maysa a pamilya a bukbuklen ti innem nga indibidual ti nagsubli sadiay Apayao bayat nga uppat met sadiay Abra ken naipaayan dagitoy ti tulong babaen iti nasao a komite.
Sigun kenni National Economic and Development Authority-Cordillera Regional Director Susan Sumbeling, nakaimplementar dagiti member agencies ti komiti iti 553 a proyekto nga aggatad ti P2.6-M iti maikadua a kagudua ti napalabas a tawen mainaig iti Balik Probinsya, Bagong Pag-asa Program.
Dinakamatna a karaman kadagiti nagbalin a karit iti implementasyon ti programa ti ‘mismatch’ iti nagbaetan ti ‘pre-identified assistance’ ken ti mismo a pagkasapulan dagiti benipisaryo.
Naamuan a puntirya ti komite a sustiniren ti adbokasiyada para iti programa ita a tawen babaen iti ad-adda pay a panangiyam-ammoda iti programa ken iti agtultuloy a koordinasyon para iti dispatch operations.
Puntiryada a maiyawid iti Cordilleras ti walo a benipisaryo para ita a tawen.
Dinakamat pay ni Balik Probinsya, Bagong Pag-asa Program Director Alicia Ilaga a ninayonan ti Department of Agriculture ti pondo ti programa para iti Cordillera iti P6-M ita a tawen.
