BAGUIO CITY – Agtaltalinaed a nababa ti balor ti daga ditoy rehion Cordillera.
Sigun kenni Aldrin Federico Bahit Jr., Statistical Operations and Coordination Division Chief ti Philippine Statistics Authority (PSA) – Cordillera, gapu iti daytoy ket agarup laeng iti P22-T ti pakabuklan a balor ti daga iti entero a rehion kas maibasar iti panagadalda idi 2015.
Kinunana a ti inaramatda a nangala iti balor ti daga ditoy rehion ket ti valuation wenno Zonal Values ti Bureau of Internal Revenue (BIR) nangruna ta awan ti umno a fair market value a mabalin nga aramaten dagitoy.
Dinakamatna a nababa ti balor ti daga ditoy rehyon nangruna ta saan pay a pinabaro ti BIR ti daanen a valuation dagitoy kadagiti daga ditoy Cordillera.
Sigun pay kenkuana, ti kadakkelan iti valuation ket dagiti built-up areas wenno dagiti developed areas a dumanon iti P18.3-T, sumaruno ti agriculture area a dumanon iti P1.8-T, forestry a P1.6-T ken aquaculture a P119-M.
Innayonna a nasken a rumbeng a masalwadan dagiti agricultural areas tapno saan dagitoy a mapukaw nangruna ta no dadduma ket mapagbalbalin dagitoy a built-up areas wenno ma-develop kas subdibisyon wenno commercial area.
