BAGUIO CITY – Nabigbigen ti bangkay a nasarakan iti kanal iti deppaar ti Access Road sadiay Purok Suyoc, Loakan Proper, Baguio City idi laeng nabiit.
Nabigbig daytoy a ni Eugene Lupian Bacani Jr., 20-anyos, construction worker ken residente ti Middle Quirino Hill, Baguio City.
Maipalagip a nasarakan ti maysa a retirado a pulis ti bangkay ni Bacani Jr. kabayatan ti panagtarayna iti nasao a kalsada.
Naamuan a manipud kadagiti nailadawan a pakabigbigan ti biktima, partikular dagiti tattoo-na ket nabaelan ti inana a nabigbig daytoy.
Manarimaan metten ti panangimbestigar dagiti pulis iti posible a nangitunda iti ipupusay ti baro nangruna ta nakitaan daytoy iti marka ti panakabekkel iti tengnged ken iti maysa a bagsol iti barukong.
Naamuan nga awan ti CCTV camera a nasarakanda iti asideg ti nakasarana ti bangkay ken awan ti street light iti nasao a disso.
Kinumpirmar met ti Baguio City Police Office – Station 4 a nailista idi kas No.9 Most Wanted Person ti istasyonda ni Bacani Jr. ken nakemmeg idi 2018 gapu iti kasona a panagtakaw ngem nakaruar iti pagbaludan kalpasan a nagpiyansa.
