ABRA, PROVINCE – Nagbigbigen ti bangkay a nasarakan iti maysa a karayan a paset ti Bal-iyang, Gayaman, Luba, Abra idi October 6 iti agdama a tawen.
Nabigbig ti biktima a ni Mr. Joan-waren Lumi-id Quinio, 48, naasawaan ken residente iti Dilong, Tubo, Abra.
Iti pannakiuman ti Bombo Radyo kenni PCMS Jan Frederick Valeros, Chief Investigator ti Luba Municipal Police Station, kinunana a naalan ti bangkay babaen kadagiti kabagian ti biktima idi October 08.
Maibasar iti imbestigasion dagitoy, naudi a nakita ti biktima a ni Joan-waren iti opisina daytoy idi paylaeng October 03, 2025.
Sigun kenni PCMS Valeros, awan ti nakita a gun shot ken dadduma pay a pakaigapuanan ti ipupusay ti biktima.
Gapu iti dayta, kinuna ti nasao nga opisial a nalmes daytoy gapu iti pannakaiyanudna.
Maibasar metlaeng iti imbestigasion, dimmalyasat ti biktima iti karayan a nakalugan ti motor ngem agingga iti pannakaisurat daytoy, saan paylaeng a nasarakan ti nasao a motor.
Posible a napasamak daytoy kabayatan ti panagdalapos dagiti napalabas a bagyo.//mp4
