Nagkaiwara dagiti bangkay kadagiti kalsada kalpasan ti napasamak a panagsusupiat iti nagbaetan ti rebelde a grupo nga M23 kontra kadagiti suldado ken pro-government militias iti kadakkelan a siudad ti daya a Congo idi laeng kalman.
Dagiti rebelde nga M23 a supsuportaran ti Rwanda ket nagkedked manipod iti gobierno ti Congo.
Kalpasan ti panagmartsa dagiti rebelde a grupo iti maysa a siudad iti nasao a pagilian, rinaut dagiti agprotprotesta iti kabesera ti maysa a compound ti United Nation ken dagiti embahada a pakairamanan dagiti embahada ti Rwanda, France ken Estados Unidos, nga inyebkasda ti pungtotda iti kunada a pannakibiang dagiti ganggannaet.
Simrek dagiti mannakigubat nga M23 idiay Goma idi laeng Lunes.
Sigun iti Congolese government ken ti dadaulo ti United Nation peacekeeping, dagiti suldado ti Rwandan ket adda sadiay Goma a mangsuportar iti kaalyadoda nga M23.
Pinulpullo a suldado ti Democratic Republic of Congo ti simmuko, ngem dadduma a soldado ken pro-government militiamen ket saan pay a simmuko.
Iti agdama, agkidkiddaw ti gobierno ti Congo ti pannakabalin ti internasional tapno madusa ti Rwanda, ken tapno agleppas ti opensiba ti M23.
Naituding met a pagtalantalan ti United Nation Security Council ti krisis a mapaspasamak sadiay, sigun iti diplomats.
