Nasarakanen ti bangkay ni Japer “Sidu” Cawi Pallogan, ti 20-anyos a lalaki nga nga immunan a naipadamag a maatap a naiyanud iti Chico River itay agsapa idiay Barangay Tanglag, Lubuagan, Kalinga itay agsapa.
Sigun iti pablaak ti lokal a gobyerno ti Lubuagan, kinuna ni Lubuagan MDRRMO head Romel Salbang a nasarakan ni bagi ni Pallogan idiay Chico River idiay Barangay Bantay, Tabuk City, dandani agalas-kuwatro ita a malem.
Naiturong metten daytoy idiay Funinaria Carbonel.
Kabayatanna, nagyaman ni Mayor Joel Tagaotao kadagiti rescuers, volunteers, ahensya ti gobyerno, local government personnel, ken ti komunidad a nakipaset iti search and recovery operation para iti biktima.
Nagyaman metlaeng daytoy iti lokal a gobyerno ti Kalinga babaen iti PDRRMO-Kalinga, Philippine Coast Guard-Kalinga Extension Office, BFP-Lubuagan Fire Station, PNP-Lubuagan MPS, kasta metten dagiti residente ti Barangays Tanglag ken Mabongtot.
Inyebkas metlaeng ti lokal a gobyerno ti nasao a munisipyo ti panakipagriknada iti pamilya a pinanawan ni Japer “Sidu” Cawi Pallogan.
Manipud iti Bombo Radyo Baguio, makipagrikna kami kadagiti pamilya ken gagayem ti pinanawan ni Japer “Sidu” Cawi Pallogan.
