BAGUIO CITY – Naisangpeten ditoy siudad ti Baguio ti bangkay ti army major a kameng ti military intelligence operative a pimmusay iti panagsaneb wenno ambush sadiay Marawi City idi napalabas a lawas.
Immunan a nabigbig daytoy a ni Major Jerico Pasas Mangalus, naasawaan, tubo ti Pampanga ken residente iti Asin Road, Baguio City.
Naamuan a malamayan ti bangkayna iti Philippine Military Academy agingga inton bigat sakbay a maiyawid sadiay Pampanga inton Mierkules.
Maipalagip a nakalugan iti Crosswind SUV ti tallo nga operatiba ti Intelligence Service of the Armed Forces-Military Intelligence Group 10 ken mangisayangkatda kuma iti intelligence operation idi sinaneb dagitoy dagiti mapapati a kameng ti Maute Group sadiay Barangay Lilod Madaya.
Nagpaut ti rinnupak dagitoy iti agarup sangapulo a minutos a nangitunda iti dagus nga ipupusay da Major Mangalus ken Corporal Bryan Libot ken nakadangran met ni Corporal Rolando Cartilla.
Ni Major Mangalus ket kameng ti PMA “Banyuhay” Class of 2002, naikamang iti maysa nga Igorota ken addaanda iti dua nga anak.
