BAGUIO CITY – Naiyawiden sadiay Mompolia, Hingyon, Ifugao ti bangkay ni Master Sgt. Pedro Butic Jr. a pimmusay kabayatan ti engkwentro ti Naval Forces Western Mindanao ken armado a grupo sadiay Sitio Langhub, Brgy Pang, Kalingalan Caluang, Sulu idi napalabas a lawas.
Iti panakiuman ti Bombo Radyo iti manangna a ni Eva Butic Inhumang, kinunana a naiyawiden sadiay Ifugao ti bangkay ti kabsatna ken inton Biyernes ket maisubli daytoy sadiay Fort Bonifacio ken maitabon iti Libingan ng mga Bayani inton Sabado.
Inladawanna ti kabsatna a naanus, independent a tao, responsable ken managayat a kabsat.
Kinunana nga adu a narigat a pannubok ti nagdalanan ni Butic, ken adu ti naglasatan daytoy a narigat a training ngem saanna a dinakdakamat kadagiti kakabsatna.
Innayunna pay nga adu nga oportunidad ti naidiaya iti kabsatna tapnu saanen kuma nga agsubli sadiay Mindanao ngem mas pinili daytoy ti agtalinaed nga sniper ti tropada uray nu pinanawan daytoy dagiti kakadwana nga sniper.
Dinakamatna pay a maysa kadagiti malagipna a dinakamat ti kabsatna ket agleppas laeng ti panagbalin daytoy a soldado nu matay daytoy.
Sangapulo ket lima a tawenen ni Butic iti serbisyo, addaan daytoy iti maysa nga anak nga agtawen iti uppat, ken rambakanna kuma ti maika-uppat a pulo a kasangayna inton Oktubre.
Maipalagip a manarimaan ti fleet-marine operations dagitoy iti nasao a lugar idi napasamak ti engkwentro a nakatayan ni Butic ken ti maysa pay a kadwa daytoy, malaksid pay iti lima a kameng ti armado a grupo a napapatay met laeng iti nasao nga operasyon.
