BAGUIO CITY- Naisangpeten iti pagilian ti bangkay ti kailyan nga Overseas Filipino Worker (OFW) a pimmusay iti aksidente sadiay Toronto Canada.
Nabigbig daytoy a ni Joenard Kindipan Humiwat a tubo ti Poblacion West, Lamut, Ifugao.
Maibasar iti report, pimmusay ni Humiwat ken ti katrabaho daytoy a ni Junard Estella Minimo manipod Zambales kasaruno iti pannakaaksidente dagitoy idi March 18, 2022.
Sigun ken Isabelita Humiwat, asawa ti biktima, malamayan ti bangkay ni Humiwat iti pagtaenganda sadiay Magalang, Pampanga iti dua nga aldaw sakbay a maiyawid sadiay Lamut, Ifugao.
Naamuan nga aktibo a myembro ti Overseas Workers Welfare Administration (OWWA) dagiti pimmusay a dua nga OFWs.
Gapu iti dayta, dagus a nangipaay ti assistance ti ahensya kasta metten iti pannakaipaay ti death benefits ken burial assistance a dumanon iti P220,000, ELAP Livelihood Assistance a P 15,000, ken ELAP Educational Assistance para kadagiti kwalipikado nga annak dagiti pimmusay nga OFWs.
