BAGUIO CITY – Nasarakan ti bangkay ti maysa a lalaki nga addaan iti bagsol iti kannigid a barukongna iti Picnic Groove sadiay Jose Abad Santos Drive, Baguio City itay agsapa.
Iti inisyal a report ti pulisya, nakita ti maysa a jogger ti biktima a nakaparintumeng ken nakasayad ti ulona iti daga iti abay ti puon ti maysa a kayo.
Inasitgan ti jogger ti biktima tapnu riingenna gaputa atapenna a nabartek laeng daytoy ngem idi iggemanna ket timmangkenen ti biktima isut gapuna a dagusna nga inreport iti Women and Children’s Protection Desk.
Segun met iti Scene of the Crime Operatives, ti saan pay a nabigbig a biktima ket mapattapatta nga agtayag iti 5’3″ agingga 5’5″, addaan iti dark complexion, 25 to 30 yrs old, ken addaan iti tribal tattoo iti kanawan nga imana.
Narekober met ti nalabaga nga sling bag ti biktima a naglaon iti maysa nga electrical tape, bassit a yellow black coin purse, straw ken bassit a transparent plastic sachet a naglaon iti maatap a marijuana leaves.
Nakita met laeng dagiti pulis ti tedted ti dara iti karton iti igid ti kalsada.
Naiturongen ti bangkay iti maysa a punerarya ditoy siudad para iti otopsiya.
