BAGUIO CITY – Nasarakan ti bangkay ti lalaki a mapapati a biktima ti summary execution iti rangkis iti baba ti kalsada sadiay Lamtang, Puguis, La Trinidad, Benguet iti malem kalman.
Sigun kenni Romwel Evangelista, magmagna daytoy iti igid ti nasao a kalsada idi timman-aw iti baba ngem sadiay a nakitana ti sapatos ti biktima sakbay ti pantalon daytoy.
Dagus daytoy a nagkiddaw iti tulong ken naigiddan met ti panaglabas ti mobile patrol ti Sablan PNP isut gapuna a dagitoy ti nangireport iti nasao a bangkay iti La Trinidad PNP.
Nakasuot ti bangkay iti black a sando nga addaan glitters, black a sweatshirt, blue jogging pants a nasuratan iti ‘ellesse’ iti kanigid a paset, white with blue stripes a rubber shoes, violet a panty ken white with black stripe a kallugong.
Nabalkot ti ulo ti biktima babaen iti blue jacket sakbay a nakabilan ti packaging tape bayat a naitali ti dua a sakana, partikular iti baba ti tumengna babaen iti masking tape.
Addaan pay daytoy iti tattoo a rosas iti kanawan a paset ti barukongna ken saan met a nalawag ti tattoo-na iti likod gapu kadagiti arigna karamot a nangpunno iti daytoy.
Kinuna met ni P/Supt. Rodrigo Leal, dadaulo ti PNP-SOCO-Baguio a ti biktima ket mapattapatta nga agtawen iti 50-55, agtayag iti nasurok 5’7 ken posible a pimmusay daytoy iti uneg ti 8-12 nga oras sakbay a nasarakan.
Nagsagrap ti biktima iti tallo a saksak, dua iti barukong ken maysa iti tengnged a nakakitaan pay iti ligature mark.
Naiturongen ti bangkay iti Bahay Damayan sadiay Marcos Highway, siudad ti Baguio.
