BAGUIO CITY – Nasarakan ti bangkay ti maysa a maladaga a babai iti agarup alas-kwatro ita a malem iti pagbasuraan sadiay Purok Sadjo, Maxicar Village, Loakan Proper, Baguio City.
Nadiskobre daytoy ti maysa a garbage collector kabayatan ti panangisinsinana kadagiti basura iti nasao a disso.
Nabalkot ti maladaga iti ules ken naikabil iti uneg ti shoe box ken iti maysa nga eco bag.
Dagus nga inreport ti garbage collector ti nasao a bangkay kadagiti opisyal ti barangay a nangireport met iti istasyon ti pulisya.
Sigun kenni P/Capt. Annie Carmel Comising, station commander ti BCPO-Station 4, kaipaspasngay ti nasao a maladaga kas maibasar iti puseg daytoy.
Umap-apela pay daytoy kadagiti nakakita iti nangibelleng iti ecobag a naikabilan ti bangkay ti maladaga tapnu ipaka-ammoda iti istasyon ti pulisya.
