BAGUIO CITY – Nasarakan ti bangkay ti maysa a drug surrenderer iti baba ti kalsada sadiay Sitio Marook, Loakan, Itogon, Benguet idi malem kalman.
Nabigbig daytoy a ni Vener Montilla, 42-anyos, driver, tubo ti Masla, Tadian, Mt. Province ken residente ti Alno, La Trinidad, Benguet.
Binigbig daytoy dagiti kakabagianna babaen iti suotna a dark blue polo shirt with white stripes, blue maong pants, black belt ken blue white a sapatos.
Iti panakiyuman ti Bombo Radyo iti ipag ti biktima, kinunana a naudi a nakitada daytoy idi May 5 ken nasarakan laengen a naibati ti lugan nga imanmanehona iti express lane iti diversion road nga agturong iti Benguet AgriPinoy Trading Center sadiay Kilometer 6.
Kinuna ti Itogon PNP nga idi agsapa kalman paylaeng a malanglang-ab dagiti motorista ti naangot nga angin iti nasao a disso ken iti panangsukimat dagiti residente ket sadiay a nasarakanda ti nasao a bangkay.
Dinakamat pay ti ipag ni Montilla a daytoy ket drug surrenderer ti La Trinidad PNP ken nagrepreport pay kadagiti aktibidad para kadagitoy.
Kabayatanna, inwaragawag ni PSupt. Rodrigo Leal, dadaulo ti PNP SOCO-Baguio a napapatay ti nasao a biktima.
Kinunana nga iti postmortem examination nga impatungpalna iti bangkay ket nakita ti dua a gunshot wound iti ulo ken likod daytoy malaksid a na-fracture ti kanigid a panga ti biktima.
Maipalagip nga immunan nga impawaragawag ti pamilya ti biktima iti Bombo Radyo ti panagpukaw ti kabagian dagitoy.
