Naiturongen iti maysa a punerarya ti bangkay ti maysa a senior citizen a pimmusay iti uram a napasamak itay parbangon iti siudad ti Baguio.
Iti pannakiuman iti Bombo Radyo kenni Abraham Dao-ayen, kapitan iti North Sanitary Camp, Baguio City, nabigbig ti biktima a ni Esteban Refani, 82-anyos.
Sigun iti opisial, nasarakan ti bangkay iti uneg iti bukodna a kuarto. Agmaymaysa laeng ti senior citizen idi napamasak ti insidente.
Maibasar iti salaysay dagiti annakna, a dinakamat ni Dao-ayen, saan a kayat ti senior citizen nga adda ti kaduana a dadduma a tao iti pagtaenganda.
Kinumpirmar metlaeng iti opisial nga awan ti kagawaan iti panagluto iti pagtaengan ti senior citizen gaputa inikkat daytoy dagiti annakda.
Ti pagtaengan ti biktima ket “totally burned”, bayat a ti kaarubana, a pagtaengan ti anakna ket “partially burned” ken agdama a maisimsimpa.
Naaramid iti light materials ti nauram a pagtaengan.
Agtultuloy paylaeng ti imbestigasion iti nasao nga insidente.
