BAGUIO CITY – Naisangpeten ditoy Baguio City ti bangkay ti kailian a sigud a hepe ti Jolo, Sulu Police Station a ni PLtCol. Walter Annayo.
Pimmusay ni Annayo kalpasan a pinaltogan dagiti saan pay a nabigbig a suspek sadiay Sultan Mastura, Maguindanao idi malem ti Sabado.
Iti inisyal a report ti Maguindanao Police Provincial Office, imparada ni Annayo ti lugan na tapnu gumatang iti buko iti Narciso Ramos Highway sadiay Barangay Macabiso idi pinalpaltogan daytoy dagiti gunman a nakalugan iti puraw a kotse a nagresulta iti dagus nga ipupusayna.
Ni Annayo ket kameng ti PNPA Bagong Tanglaw Class 2006 ken daytoy ti hepe ti Jolo Police Station idi napasamak ti panangpalpaltog dagiti kameng ti Jolo Police Station kadagiti kameng ti Intelligence Service Unit ti Philippine Army a nakatayan ti uppat a soldado, pakairamanan ti Cordilleran a ni Major Marvin Indammog idi June 29.
Gapu iti insidente ket naikkat iti pwesto ni Annayo ken naiyakar iti Regional personnel Holding Administrative Office ti BARMM Police Regional Office.
