BAGUIO CITY – Nagbalinen a permanente ti Bantay Basura Program ti La Trinidad, Benguet kalpasan a naaprobaran ti ordinansa ken panakailatang ti tinawen a pondo para iti nasao a programa.
Sigun kenni La Trinidad Municipal Environment and Natural Resources Officer Arthur Pedro, nabiag manen ti 185 a bantay basura advocates ita a tawen nga agbantay kadagiti amin a garbage collection points dagiti 16 a barangay ti munisipyo.
Inaklonna a naksayan ti bilang dagiti bantay basura advocates kadagiti dadduma a barangay malaksid kadagiti barangay ti Pico ken Balili iti sentro ti munisipyo nga addaan ti ado a basura.
Dinakamatna a puntiryada a maipaayan iti saggaysa a bantay basura advocate ti tunggal garbage collections points kadagiti babbarangay tapnu matutukan ti polisiya a ‘segregation at source’.
Mangnamnama ni Pedro a manayunan pay ti pondo ti munisipyo kadagiti masungad a tawen tapnu manayunan dagiti bantay basura advocates sadiay.
Naamuan a P3.5-M ti inisyal a pondo nga inlatang ti munisipyo para iti naan-anay nga implementasyon ti nasao a programa ita a tawen.
Maibasar iti kaudian a survey, dumanon iti 30-35 a tonelada a residual wastes ti innaldaw a mapapataud iti entero a La Trinidad. -report from Bombo Jorton Campana
