BAGUIO CITY – Naipaay ti Medal of Valor wenno Medalya ng Kagitingan iti maysa nga Igorot a marino a pimmusay bayat ti panagserbina iti pagilian kabayatan ti Marawi Siege idi 2017.
Daytoy ket ni Private First Class (PFC) Gener Tinangag manipud Lunas, Barlig, Mountain Province.
Iti pammilin ni Presidente Rodrigo Duterte, naipaay kenni Tinangag ti kangatoan a military honor ti Armed Forces of the Philippines gapu iti kinabanuar wenno saan a matukadan a sakripisyo nga impakitana kabayatan ti Marawi Siege.
Maipalagip a karepreport laeng ni PFC Tinangag kas Assistant Automatic Rifleman ti Marine Battalion Landing Team-5 idi nagboluntaryo daytoy ken ti tallo pay a kakadwana a mangala kadagiti nadangran ken natay a kakadwada iti baet ti nakaro a risgo gapu iti panagpalpaltog ken panagbomba dagiti kalaban.
Kinabaelanna a nagkaradap kadagiti ruins tapnu laeng maka-asideg kadagiti kakadwada iti baet ti risgo a matamaan daytoy ken kalpasan ti sumagmamano nga evacuation trips, nabaelan ni Tinangag ken dagiti kakadwana a maispal ti uppat a nadangran a marino manipud iti naglemmenganda a moske.
Nagsubli ni PFC Tinangag iti kill zone ken maymaysana a nangrekober iti bangkay ti napasag a daydi 1LT John Frederick Savellano.
Nupay kasta, natamaan ti tianna iti bala manipud iti sniper ken shrapnel ti granada dagiti kalaban ngem inkagumaanna latta nga imbagkat ti bangkay ni Savellano agingga iti Casualty Collection Point.
Ditoy a nag-collapse ni Tinangag gapu kadagiti tamana agingga a pimmusay bayat ti panakatamingna.
Nangitunda ti panagsakripisyona iti panakapabileg ti tropa ti gobyerno para iti panangituloyda iti gubat a nagresulta iti panakawayawaya ti Marawi City manipud kadagiti terorista.
