BAGUIO CITY – Nakemmeg ti maysa a barangay kagawad iti buy-bust operation nga impatungpal ti nagtipon a puwersa Baguio City Police Office Station 3 ken ti Philippine Drug Enforcement Agency- Cordillera sadiay Villamor St. Barangay Lualhati ditoy siudad ti Baguio itay parbangon.
Nabigbig daytoy a ni Rafael Sotelo Rancapan alyas Paeng a kagawad ti BGH Compound, Baguio City.
Naala manipud iti suspek ti maysa a transparent plastic sachet a naglaon iti maatap a shabu ken sangaribo a pisos a buy bust money.
Impeksa ti PDEA ti panakadismaya dagitoy gaputa nu mamingsan, dagiti ipaspasidongda iti lectures kontra iti iligal a droga ket dagitoy pay ti mairamraman iti illegal drug trade.
Pinadas met ti Bombo Radyo News Team nga alaen ti reaksyon ni Rancapan ngem nagkedked daytoy nga agsarita.
Iti agdama ket sumangsango daytoy iti kaso a panaglabsing iti Comprehensive Dangerous Drugs Act of 2002.
