SAGADA, Mountain Province — Idineklara ng Barangay Pide sa Sagada ang Cordillera Peoples Alliance (CPA) at mga kaugnay nitong grupo bilang persona non grata sa bisa ng Resolution No. 13, Series of 2026, na pinagtibay noong Hulyo 24, 2026.
Ayon sa resolusyon, maaaring magdulot ng takot sa mga residente ang mga naturang grupo at makaapekto sa sosyo-ekonomikong pag-unlad ng barangay.
Binigyang-diin din ng barangay ang pangangailangan ng pagtutulungan ng pulisya, militar at mga sibilyan upang maiwasan ang terorismo, insurhensiya at iba pang krimen.
Binanggit sa resolusyon ang Executive Order No. 70, na nagtatag sa mga mekanismo ng pamahalaan para wakasan ang mga lokal na armadong tunggalian at isulong ang kapayapaan at kaunlaran.
Inatasan din na ipadala ang resolusyon sa mga kinauukulang tanggapan para sa kanilang kaalaman at sanggunian.
Gayunman, ang mga pahayag sa resolusyon ay mga batayan ng posisyon ng barangay at hindi awtomatikong patunay ng pagkakasala ng CPA o mga kaugnay nitong grupo.
Samantala, maghahain ng reklamo ang Cordillera Peoples Alliance (CPA) sa Commission on Human Rights–Cordillera Administrative Region (CHR-CAR) sa Oktubre 14, 2026, kaugnay ng resolusyong nagdedeklara sa grupo bilang persona non grata sa Mountain Province.
Sa pabatid ni CPA Secretary-General Bestang Dekdeken, inaanyayahan ang mga mamamahayag na dumalo sa paghahain ng reklamo sa tanggapan ng CHR-CAR ganap na alas-10 ng umaga.
Kasunod nito, sasamahan ng mga kinatawan ng mga komunidad mula Mountain Province ang pagsusumite sa National Commission on Indigenous Peoples–CAR (NCIP-CAR) ng resolusyon ng Barangay Guina-ang sa Bontoc, alas-11 ng umaga.
Nananawagan ang resolusyon ng Barangay Guina-ang na ihinto ang mga aktibidad ng Energy Development Corporation (EDC) at pinagtitibay ang pag-urong ng barangay sa Memorandum of Agreement para sa feasibility study ng kompanya kaugnay ng potensiyal ng geothermal energy sa lugar.
Ayon sa CPA, mamamahagi ng mga kopya ng reklamong ihahain sa CHR-CAR at ng resolusyong isusumite sa NCIP-CAR sa mismong araw ng paghahain.
