BAGUIO CITY – Naituding a maipaima iti kustodiya ti DSWD ti menor de edad a nakemmeg gapu iti panangtakawna iti maysa a motorsiklo sadiay Barangay Poblacion, Pudtol, Apayao.
Ti nasao a menor de edad ket agtawen iti 13 ken residente ti Bacbacan, Asin Road, Baguio City.
Nabigbig met ti akinkukua iti nasao a motorsiklo a ni Silver Ian Dima-ano, 28-anyos, baro, mannursuro ken residente ti Poblacion, Pudtol, Apayao.
Maibasar iti report, imparada ti biktima ti motorsiklona iti sangwanan ti balay ti mayor ti munisipyo ti Pudtol sakbay a napan sadiay munisipyo ti Luna para iti maysa a seminar iti agsapa idi Miyerkoles.
Nadiskobre laengen ti mannursuro a mapukpukaw ti motorsiklona idi nakasubli iti rabii idi kalman a rason tapnu agreport iti pulisya.
Dagus met a nangipatungpal ti pulisya iti dragnet operation a nagresulta iti panakarekober ti nasao a motorsiklo ken iti panakakemmeg ti suspek.
