BAGUIO CITY – Pimmusay ti maysa a barito kalpasan nga inatalan ti maysa a water truck sadiay deppaar ti Crystal Cave Road, Baguio City idi kanikadua ti rabii.
Ti biktima ket 15 anyos, estudyante ken residente ti Upper Asin Road, Baguio City bayat a nabigbig ti driver ti nasao a water truck a ni Bonifacio Ronquillo III, 19 anyos ken residente ti Upper Asin Road, Baguio City.
Maibasar iti report ti pulisya, nabuntog nga agtartaray ti nasao a water truck a naglaon iti 20 a drum ti danum nga imanmaneho ni Ronquillo paturong iti Crystal Cave Turning Point idi mapapati a kinamat daytoy ti grupo dagiti agtutubo, pakairamanan ti biktima.
Nakakapet ti tallo kadagitoy iti likod ti nasao a truck ngem napaay ti biktima isut gapuna a kinamatna latta ti truck ken nagkapet iti right side ti trak.
Nupay kasta, naibbatan ti biktima ti nagkapetanna a rason tapnu matnag ken maatalan iti nasao a trak babaen iti kanawan a pilid iti likod a nangitunda iti dagus nga ipupusay ti biktima gapu iti nasagrap daytoy nakaro a dunor iti ulo.
Nakumpiskar met ti driver’s license ti driver ken naipilaan iti kaskenan a kaso.
