BAGUIO CITY–Palpalagipan manen ti La Union Provincial Disaster Risk Reduction and Management Council (PDRRMC) dagiti taga-rehiyon Cordillera nga agannad dagitoy no agdigosda kadagiti beach wenno baybay sadiay nangruna no mapaspasaran ti napigsa a dalluyon.
Impalagip daytoy ti nasao nga opisina kasaruno ti ipupusay manen ti maysa nga agtutubo manipud Benguet kalpasan a nalned daytoy iti baybay sadiay Bauang, La Union.
Nabigbig ti biktima a ni Vicente Bana-ang Colas, 16-anyosm ken residente ti Bad-ayan, Baculongan Sur, Buguias, Benguet.
Kinuna iti Bombo Radyo ti kasinsinna a ni Geraldine Salipan Aten-an a naiguyod iti napigsa a dalluyon ti biktima iti agarup alas nuebe ken alas dies ti agsapa idi kalman ngem idi laeng rabii a nasarakan ti bankay daytoy babaen kadagiti rescuers.
Kinunana a saan met a naka-inom iti arak ken ammo nga aglangoy ti biktima ngem saan daytoy a nabaelan ti napigsa a dalluyon.
Naammuan nga adda pay ti kakadua ni Vicente nga inguyod ti dalluyon ngem naispal a dagus dagitoy.
Kabayatanna, naiyawid metten iti pagtaenganda sadiay Buguias, Benguet ti bangkay ti biktima a naituding a maitabon inton Abril 12, aldaw ti Huwebes.
Immuna metten a kinuna ti PDRRMC ti La Union a kaaduan a mabikbiktima iti panakalned kadagiti baybay sadiay ket dagiti taga-Cordillera gaputa saan pay a kabisado dagitoy ti kasasaad ti taaw nangruna no mapaspasaran ti napigsa a dalluyon.
