Sinurot ken nilapdan ti maysa a barko ti China Coast Guard (CCG) ti barko ti Philippine Coast Guard a BRP Cabra iti 170 a kilometro iti taaw ti Zambales idi kalman.
Iti maysa a video, nagtultuloy nga inasitgan ti Chinese vessel 3302 ken nilapdanna ti barko a Cabra iti baet dagiti “radio challenge.”
Adda iti gundaway a 16 a metro laeng ti kaadayo ti barko ti China manipud iti Cabra.
Iti sabali pay a video, makita met ti Chinese vessel iti abay ti PCG vessel.
Sigun kenni PCG spokesperson for the West Philippine Sea (WPS) Commodore Jay Tarriela a nabalinan ti BPR Cabra a naliklikan ti panagdinnungpar.
Dinakamat ni Tariella a saan laeng a daytoy ti umuna a gundaway nga immasideg ti China Coast Guard iti PCG vessel.
Kinunana a ti panggep ti PCG ket tapno malapdan ti China a mangibaga iti adu a tawen a panagpatroliada iti nasao a lugar.
Iti agdama, awan pay ti komento ti embahada ti China.
