Naduktalan dagiti eksperto ti salun-at idiay China ti baro a mutated mpox strain clade Ib bayat nga agwarwaras ti impeksion ti virus iti ad-adu pay a pagilian kalpasan nga indeklara ti World Health Organization ti nasao a sakit kas global public health emergency idi napalabas a tawen.
Sigun iti Center for Disease Control and Prevention ti China, nasarakanda iti cluster outbreak ti Ib subclade a nangrugi ti impeksion iti maysa a ganggannaet nga addaan iti pakasaritaan ti panagbiahe ken panagnaed iti Democratic Republic of the Congo.
Gapu iti ganggannaet nga addaan ti impeksion, naapektaran ti uppat nga indibidual gapu iti nasinged a pannakilangenda.
Dagiti ket naapektaran ket saan unay a nakaro dagiti sintomas a makapaspasar iti “skin rash” ken “blisters.”
Ti monkeypox ket agwarwaras babaen iti “close contact” ken mangpataud kadagiti trangkaso a sintomas ken mapunno iti nana a sugat iti bagi.
Nupay gagangay ti sintomas ti nasao a sakit, mabalin a makapapatay daytoy kadagiti sumagmamano a kaso.
Maipalagip nga idi bulan ti Agosto idi napalabas a tawen, indeklara ti World Health Organization ti monkeypox kas global public health emergency para iti maikadua a gundaway kasaruno ti outbreak idiay Democratic Republic of Congo (DRC) nu sadinno nagwaras daytoy iti dadduma a pagilian.
